OPEN BILBAO 2026 EDIZIOA
2026ko apirilaren 21a
Gaur egungo grafiaren mapa: OPEN Portfolio nazioarteko hedapena zabaltzen ari da
OPEN Portfolio-ren XIII. edizioak ehun eskaera baino gehiago jaso ditu, hogei herrialde baino gehiagotatik. Ez da datu hutsala: edizio bakoitzean errepikatu eta handitzen den tentsio baten neurgailua da, nolabait.
OPEN Portfolio, hasiera batean, grafiaren esparruko artista berrientzako topagune gisa sortu zen, baina denborarekin mugitzen den mapa baten antzeko zerbait bihurtu da. Egonkortasunetik marrazten ez den mapa bat, baizik eta praktiken, hizkeren eta ibilbideen metaketatik eraikitzen dena; elkar gurutzatu bai, baina inoiz erabat finkatzen ez direnak.
Aurten, mapa hori Espainiako hainbat hiritan hedatzen da —Madril, Valentzia, Euskal Herria, Granada, Sevilla, Salamanca, Vigo— eta Latinoamerikaraino iristen da, Mexiko, Argentina, Txile, Kolonbia, Uruguai, Panama edo Venezuelatik etorritako proposamenekin. Europan ere zabaltzen da —Polonia, Italia, Belgika, Kroazia, Ukraina, Alemania, Portugal, Suitza, Serbia— eta bestelako testuinguruetara, hala nola Maroko, Iran, Siria edo Txina.
Garrantzitsuena ez da zerrenda bera, baizik eta hortik kanpora isurtzen dena. Proposamenek ez diote erantzuten erregistro bakar bati, ezta grafiaren ideia bakar bati ere. Prestakuntza bidean diren artistak eta ibilbide sendoak dituztenak elkarrekin bizi dira; teknika klasikoak —kalkografia, serigrafia, litografia— eta kategoria itxietan sartzea bilatzen ez duten hurbilketa garaikideak, baizik eta horiek desegiten edo lekualdatzen dituztenak.
Gurutzatze hori ez da proiektuaren albo-ondorio bat: haren muina da.
Hemendik aurrera hautaketa prozesua hasiko da. Epaimahai batek eskaera guztiak aztertuko ditu, eta 2026ko ekainaren 12tik 14ra Bilboko Rekalde Aretoan egingo den OPEN Portfolio-ren XIII. edizioan parte hartuko duten 14 artistak hautatuko ditu.
Eskerrik asko proposamenak pentsatu eta garatzeko denbora hartu duzuen guztioi. Aurten jasotakoak ez du soilik proiektuaren hedadura handitzen: baieztatzen du gaur egungo grafia lurralde eztabaidatua dela, etengabe zabaltzen ari dena eta, batez ere, elkarrizketan dagoena.